Rustenberg open gardens

.

Rustenberg - gestig in 1682 - is een van die pragtige Kaaps-Hollandse plase wat Stellenbosch so uniek maak.

Saterdag het ons bietjie gaan #lééfstellenbosch deur Rustenberg se welige tuine te besoek.

.

WAT IS DIE JAARLIKSE OPEN GARDENS? 

Rustenberg se tuin is reeds vir vele jare 'n objek van liefde en toewyding, met Pietman Diener (ook 'n Stellenbosser) aan die stuur van die tuin se uitleg en versorging.

Die tuin is uiteengesit met 'n aantal 'tuinkamers' waarvan meeste in 'n ou Engelse styl ontwerp is. Die prieël is 200 jaar oud (opgerig deur John X Merriman) en die tuine bevat 'n pragtige versameling ou bome en outydse rose.

.

WIE KAN KOM?

Jonk en oud, mense van alle tale en agtergronde! Dit was heerlik om die naweek heelwat kinders in die tuin te sien, nuuskierig besig om plantjies te bekyk of uitbundig die vryheid van die grasperke te geniet.

Bring sonskerm of 'n hoed as dit 'n warm dag is. As jy moeilik stap of 'n rolstoel benodig, is dit dalk nodig om spesiale reëlings te tref.

.

HOE OUD IS DIE PLAAS EN WAT IS DIE GESKIEDENIS?

Rustenberg is in 1682 gevestig deur Roelof Pasman, 'n Europeër uit die Meurs/Maas distrik in België en Holland. Wynbou was baie suksesvol in die Simonsberg omgewing en sy wynplaas het floreer.

In die vroeë 1800's het die destydse eienaar die plaas in twee verdeel en die Schoongezicht gedeelte aan sy skoonseun gegee het.

In die middel van die 1800's het 'n ernstige resessie die Kaap getref en 'n wingerdsiekte baie wynplase in finansiële nood gedompel. Soos met Boschendal, is die plaas Schoongezicht deur Mnr John X Merriman oorgekoop, finansieël stabiliseer en opgebou tot sy vorige Kaaps-Hollandse glorie.

Die Barlow familie het in 1941 beide Rustenberg en Schoongezicht bekom, die twee plase herenig, en vir die afgelope 70 jaar as eienaars bestuur.

In 2001 het Rozanne Barlow besluit om die tuin te restoreer. Die ou tennisbaan is in 'n pragtige labarint omskep, en die prieël is herstel en met rankrose en ander geurige blomme versier. .